नगर तालुका पोलीसांनी महामार्गावर वाहने अडवून लुटमार करणारी टोळी केली गजाआड!

अहमदनगर दि.२० जुलै (प्रतिनिधी) – नगर तालुका पोलिस स्टेशनच्या हद्दीतअसलेल्या
नगर– पुणे महामार्गावर वाहने अडवून जबरी चोरी करणाऱ्या टोळीस गजाआड करण्यात नगर तालुका पोलिसांना यश आले आहे.या टोळीकडून रोख रकमेसह 57 हजार रुपये किंमतीचा मुद्देमाल जप्त करण्यात आला आहे. आकाश सुभाष सोलट, अक्षय राजु साळवे व दोन विधिसंघर्षित बालके पकडण्यात आलेली आहेत.
जिल्हा पोलिस अधीक्षक मनोज पाटील, अपर पोलिस अधीक्षक सौरभ अग्रवाल, नगर ग्रामीण उपविभागीय पोलिस अधिकारी अजित पाटील यांच्या मार्गदर्शनाखाली नगर तालुका पोलिस ठाण्याचे प्रभारी अधिकारी सपोनि राजेंद्र सानप, त्यांचे पथकातील नगर तालुका पोलीस ठाण्याचे पोउपनि युवराज चव्हाण, पोहेकॉ काळे, पोहेकॉ इथापे, पोना योगेश ठाणगे, पोना राहुल शिंदे, मपोना धनवडे, पोकॉ थोरात, पोकॉ खेडकर आदिंच्या पथकाने ही कारवाई केली आहे.
याबाबत समजलेले माहिती अशी की, दि. १६ जूनला चास शिवार येथे पिकअप गाडी खराब झाल्याने थांबले असता तीनजण दुचाकीवर येऊन चाकूचा धाक दाखवून २७ हजार ५०० रुपये रोख रक्कम व समसँग कंपनीचा मोबाईल चोरुन नेला होता होता. या लक्ष्मण राजु रसाळ (रा हडपसर जि. पुणे) यांनी दिलेल्या फिर्यादीवरून नगर तालुका पोलीस ठाण्यात गुरनं ३७८ /२०२२ भादवी कलम ३९४, ३४ प्रमाणे गुन्हा दाखल करण्यात आला आहे. या दाखल गुन्ह्याचा तपास चालू असताना दि.२० जुलैला रात्री मिळाली की चासगावच्या शिवारात काहीजण वाहने अडवून जबरी चोरी करण्याचा प्रयत्न करीत आहेत. त्यावरुन तात्काळ नगर तालुका पोलीस ठाण्याचे सपोनि राजेंद्र सानप स्टाफसह रवाना होऊन सापळा लावून आरोपी आकाश सुभाष सोलट, अक्षय राजू साळवे व दोन विधिसंघर्षित बालके त्याचे सोबत मिळून आले. त्यांना ताब्यात घेऊन विचारपुस केली असता आरोपी यांनी गुन्हा केल्याचे कबुली दिली. इतर ट्रक चालकांकडून जबरी चोरी केलेले दोन मोबाईल काढून दिले. आरोपींकडून गुन्ह्यातील मुद्देमाल हस्तगत करण्यात आला आहे.