नगरमध्ये शहर काँग्रेसच्या वतीने जनसंवाद यात्रेचे माजी मंत्री आ.थोरात, आ.धंगेकरांच्या उपस्थितीत आयोजन चितळे रोडवर जनसंवाद सभेने होणार समारोप

अहमदनगर दि. ९ सप्टेंबर (प्रतिनिधी) : देशातील वाढती महागाई, बेरोजगारी तसेच शहरातील स्थानिक प्रश्नांच्या अनुषंगाने थेट नगरकरांशी संवाद साधण्यासाठी शहर जिल्हा काँग्रेसच्या वतीने राज्याचे माजी महसूल मंत्री आ. बाळासाहेब थोरात, काँग्रेसचे ओबीसी नेते कसबा विधानसभा मतदारसंघाचे आ. रवींद्र धंगेकर यांच्या प्रमुख उपस्थितीत थोरात, शहर जिल्हाध्यक्ष किरण काळे यांच्या नेतृत्वाखाली येत्या रविवारी जनसंवाद यात्रेचे आयोजन करण्यात आले आहे. यात्रेचा समारोप राजकीय दृष्ट्या महत्त्वाच्या मानल्या जाणाऱ्या चितळे रोडवर जनसंवाद सभेने होणार असल्याची माहिती शहर जिल्हा काँग्रेसच्या वतीने देण्यात आली आहे.

प्रसिद्धी पत्रकात म्हटले आहे की, पारंपरिक मिरवणूक मार्गावरून जनसंवाद यात्रा जाणार आहे. सायंकाळी पाच वाजता छत्रपती शिवाजी महाराज यांच्या पुतळ्याला पुष्पहार अर्पण करून यात्रा सुरू होईल. भारतरत्न डॉ. बाबासाहेब आंबेडकर पुतळा, क्रांतीसुर्य महात्मा फुले पुतळ्याला अभिवादन करून शहराचे ग्रामदैवत विशाल गणपतीचे दर्शन घेतले जाईल. त्यानंतर आशा टॉकीज, माणिक चौक, एमजी रोड, तेली खुंट, नेता सुभाष चौक मार्गे यात्रेचा समारोप शहर काँग्रेसच्या शिवनेरी जनसंपर्क कार्यालयासमोर जनसंवाद सभेने होणार आहे.

यात्रा शुभारंभाच्या वेळी छत्रपती शिवाजी महाराजांच्या अश्वारूढ पुतळ्यासमोर शिवकालीन मर्दानी खेळांचे प्रदर्शन केले जाणार आहे. यात्रे दरम्यान बाळासाहेब थोरात, किरण काळे हे व्यापारी, छोटे व्यावसायिक, कष्टकरी, भाजीवाले, नागरिक यांच्याशी थेट संवाद साधणार आहेत. अनेक वर्षानंतर बाजारपेठेतून काँग्रेसची यात्रा निघत आहे. काँग्रेस कार्यकर्ते उत्साहात यात्रेची तयारी करत आहेत. राहुल गांधींच्या कन्याकुमारी ते कश्मीर या सुमारे ३५०० किलोमीटरच्या भारत जोडो यात्रेची नुकतीच वर्षपूर्ती झाली आहे. या निमित्ताने काँग्रेसने देश ढवळून काढला आहे. वर्षपूर्तीचा आनंदोत्सव देखील यावेळी शहर काँग्रेस साजरा करणार आहे.

नगर दक्षिण लोकसभा, नगर शहर विधानसभा मतदार संघाच्या जागेवर काँग्रेसने दावा ठोकला आहे. लोकसभेला बाळासाहेब थोरात, विधानसभेला किरण काळे यांच्या उमेदवारीची कार्यकर्त्यांनी श्रेष्ठींकडे जोरदार मागणी केली आहे. त्यातच शहराच्या मध्यवर्ती बाजारपेठेतून ऐतिहासिक पारंपरिक मार्गावरून शहर काँग्रेसने यात्रा आणि सभेचे आयोजन केल्यामुळे सर्वच राजकीय पक्षांसह नगरकरांचे लक्ष याकडे लागले आहे.

आ. धंगेकरांचा विशेष सत्कार :
कसबा विधानसभा मतदारसंघाची पोटनिवडणूक राज्यात लक्षवेधी झाली होती. भाजपने गिरीश बापटांच्या विजयासाठी मोठी ताकद लावली होती. मात्र काँग्रेसने भाजपला धोबीपछाड देत भाजपचा बालेकिल्ला असणारा कसबा मतदारसंघ खेचून घेतला होता. या ऐतिहासिक विजया नंतर पहिल्यांदाच आ.रवींद्र धंगेकर नगर शहरात येत आहेत. ते काँग्रेसचा राज्यातील महत्त्वाचा ओबीसी चेहरा आहेत. यावेळी त्यांचा शहर जिल्हा काँग्रेसच्या वतीने किरण काळे यांच्या हस्ते विशेष सत्कार केला जाणार आहे.