नागलवाडी परिसरात अवैध वाळू वाहतूक करणारा डंपर प्रांताधिकारी पथकाच्या ताब्यात. पंधरा दिवसात ५ वाहनांवर कारवाई करीत महसूलचा वाळू तस्कराना दणका

कर्जत (प्रतिनिधी ): दि १६ जून
नागलवाडी(ता.कर्जत) येथे प्रांताधिकारी डॉ अजित थोरबोले यांच्या पथकाने अवैध वाळू वाहतूक करणारा डंपर ताब्यात घेतला. महसूल विभागाची जून महिन्यात लागोपाठ कारवाईने वाळू तस्कराचे चांगलेच कंबरडे मोडले आहे. जून महिन्यातील पंधरा दिवसांतील ही पाचवी कारवाई आहे.
बुधवार, दि, १५ रोजी, संध्याकाळी १०:३० वाजता प्रांताधिकारी डॉ अजित थोरबोले यांना नागलवाडी ता.कर्जत येथील सीना नदीपात्रातून अवैध वाळू उपसा करून त्याची वाहतूक होत असल्याची बातमी मिळाली. प्रांताधिकारी थोरबोले यांनी तहसीलदार नानासाहेब आगळे यांना तात्काळ पथक तयार करण्याचे सूचना केल्या. यावेळी नागलवाडी शिवारात त्यांना विनापरवाना अवैध वाळू वाहतूक करताना एक डंपर आढळून आला. त्यास ताब्यात घेत तहसील कार्यालयात दंडात्मक कारवाईसाठी जमा करण्यात आला असल्याची माहिती तहसीलदार आगळे यांनी पत्रकारांना दिली. या कारवाईत स्वता प्रांताधिकारी डॉ अजित थोरबोले यांच्या मार्गदर्शनाखाली तहसीलदार नानासाहेब आगळे, तलाठी गणेश सोनवणे, धुलाजी केसकर, विश्वास राठोड यांच्यासह पोलीस कर्मचारी सहभागी झाले होते. १५ दिवसांत कर्जत महसूल पथकाने वाळू तस्करावर लागोपाठ कारवाई करीत त्यांना चांगलाच हिसका दाखवला आहे.
चौकट : सन २१-२२ वर्षात महसूल विभागाने गोळा केले जवळपास ६० लाख
मागील वर्षी सन २०२१-२२ वर्षात महसूल विभागाने अवैध गौणखनिज कारवाईत ४१ वाहनांवर दंडात्मक कारवाई करीत जवळपास ५९ लाख ९२ हजार रुपयांचा महसूल गोळा केला. तर१ एप्रिल २२ ते १५ जून २२ या तीन महिन्यात १४ वाहनांवर कारवाई करीत १३ लाख ४१ हजार रुपयांचा दंड गोळा केला. जून महिन्यातील १५ दिवसांत ५ अवैध वाळू वाहतूक करणाऱ्या वाहनांना महसूल विभागाने ताब्यात घेत वाळू तस्कराना चांगलाच दणका दिला आहे.