अहमदनगर (प्रतिनिधी)कोयत्याने हल्ला करून एकाचा खून करण्याचा प्रयत्न करण्यात आला.या घटनेमुळे नगर शहरातील नागरिकांमध्ये भीतीचे वातावरण निर्माण झाले आहे.या घटनेत एकावर गुन्हा दाखल करण्यात आला आहे. याबाबतची सविस्तर माहिती अशी की वाहन पार्किंगच्या कारणातून व्यापार्‍याच्या अंगावर दुचाकी घालून व कोयत्याने हल्ला करून त्यांना जीवे मारण्याचा प्रयत्न केला. अहमदनगर शहरातील डावरे गल्लीत ही घटना घडली. किशोर मिस्त्रीलाल मुथ्था (वय 63 रा. शिल्पा अपार्टमेंट, भन्साळी शोरूमच्या पाठीमागे, अहमदनगर) असे व्यापार्‍याचे नाव आहे. त्यांनी कोतवाली पोलिस ठाण्यात दिलेल्या फिर्यादीवरून आरोपीविरूध्द खूनाचा प्रयत्न, आर्म अ‍ॅक्ट कलमान्वये गुन्हा दाखल करण्यात आला आहे.
साहील मोहंम्मद शाकीर सय्यद (रा. कस्तुरी कॉम्प्लेक्स, डावरे गल्ली, अहमदनगर) असे गुन्हा दाखल झालेल्या आरोपीचे नाव आहे. कोतवाली पोलिसांनी त्याला ताब्यात घेतले आहे. बुधवारी रात्री आठ वाजेच्या सुमारास किशोर मुथ्था हे त्यांच्या डावरे गल्लीतील सौरव डिपार्टमेंट येथे होते. त्यावेळी किशोर यांचा मुलगा सौरव मुथ्था व स्वर्णीम मुथ्था अपार्टमेंटच्या पार्किंगमध्ये बसलेले असताना साहील सय्यद हा तेथे आला व अपार्टमेंटमध्ये दुचाकी पार्किंग करायची नाही, असे म्हणत शिवीगाळ, दमदाटी करायला लागला. नंतर तो किशोर यांच्याकडे दुकानात गेला.
किशोर त्याला म्हणाले, पार्किंग आमचे असून मी सदर ठिकाणी गाडी लावणार आहे. या बोलण्याचा साहील याला राग आल्याने त्याने त्यांच्याकडील दुचाकी किशोर यांच्या अंगावर घातली तेव्हा किशोर बाजूला झाले. साहील याने दुचाकीच्या डिक्कीतून कोयता काढून किशोर यांना जीवे मारण्याच्या उद्देशाने डोक्यात मारण्याचा प्रयत्न केला असल्याचे फिर्यादीत म्हटले आहे.
