अहिल्यानगर दि. 1 डिसेंबर (प्रतिनिधी )प्रस्तुत बातमीची हकिगत अशी की, फिर्यादी श्री.दारासिंह तुकाराम डावर, वय 38, रा.नांदुर, ता.राहाता हे दिनांक 28/11/2024 रोजी दुपारी 12.00 वा.सुमारास मजुरांना मजुरीचे पैसे वाटपासाठी घेऊन जात असताना नांदुर ता.राहाता याठिकाणी अज्ञात आरोपीतांनी स्विफ्ट कारने फिर्यादीचे मोटार सायकलला धडक दिली. आरोपीनी फिर्यादीस कोयत्याचा धाक दाखवून त्यांचेकडील 5,18,000/- रूपये रोख रक्कम हिसकावून चोरून नेली. याबाबत श्रीरामपूर शहर पोलीस ठाणे गु.र.नं. 1117/2024 बीएनएस कलम 309 (6), 3 (5) प्रमाणे जबरी चोरीचा गुन्हा दाखल करण्यात आलेला आहे.
सदर घडलेल्या घटनेबाबत श्री.राकेश ओला, पोलीस अधिक्षक अहिल्यानगर यांनी पोनि/श्री.दिनेश आहेर, स्थानिक गुन्हे शाखा यांना गुन्हे उघडकीस आणणेबाबत विशेष पथक नेमुण कारवाई करणे बाबत आदेश दिले होते.
नमुद आदेशा प्रमाणे पोनि/श्री. दिनेश आहेर, स्थानिक गुन्हे शाखा यांनी स्थानिक गुन्हे शाखा व तपास पथकातील पोलीस अंमलदार मनोहर गोसावी, गणेश भिंगारदे, अतुल लोटके, फुरकान शेख, अमृत आढाव, मेघराज कोल्हे, रमिजराजा आत्तार व अरूण मोरे अशांचे पथक नेमुण गुन्ह्यातील आरोपींची माहिती व शोध घेणेबाबत सुचना व मार्गदर्शन केले.
गुन्हयांचे तपासामध्ये तपास पथकाने घटनाठिकाणी भेट देवुन, तांत्रीक विश्लेषणाच्या आधारे आरोपीचा शोध घेत असताना दिनांक 30/11/2024 रोजी तपास पथकास गुप्त बातमीदारामार्फत माहिती मिळाली की, सदरचा गुन्हा हा आरोपी नामे इम्रान आयुब शहा, रा.वॉर्ड नं.1, श्रीरामपूर याने त्याचे साथीदारासह केला असून गुन्हा करतेवेळी वापरलेल्या गाडीसह स्विफ्ट डिझायर गाडी क्र.एमएच-20-सीसी-9500 मधुन गणेशनगर येथून वाकडी रोडने श्रीरामपूरकडे येणार असलेबाबत खात्रीशीर माहिती मिळाली. तपास पथकातील पोलीस अंमलदार यांनी तात्काळ वाकडी येथे सापळा रचुन संशयीत स्विफ्ट कार थांबवून 5 संशयीत इसमांना ताब्यात घेत असताना एक संशयीत इसम पळून गेला.उर्वरीत 4 संशयीत इसमांना ताब्यात घेतले. ताब्यातील इसमास त्याचे नाव गांव विचारले असता त्याने त्याचे 1) नाव इम्राण आयुब शहा, वय 28, रा.आशीर्वादनगर, वॉर्ड नं.1, श्रीरामपूर, जि.अहिल्यानगर 2) आनंद अमर पवार, वय 21, रा.दत्तनगर, श्रीरामपूर, जि.अहिल्यानगर 3) शादाब अब्बास शेख, वय 21, रा.दत्तनगर, श्रीरामपूर, जि.अहिल्यानगर 4) रितेश बाबासाहेब आढाव, वय 19, रा.दत्तनगर, श्रीरामपूर, जि.अहिल्यानगर असे असल्याचे सांगितले. आरोपीकडे पळून गेलेल्या साथीदाराबाबत माहिती विचारली असता 5) अमीत पठारे, रा.बेथेल चर्चजवळ, सुतगिरणी, श्रीरामपूर, जि.अहिल्यानगर (फरार) असे असल्याचे सांगीतले.
तपास पथकाने पंचासमक्ष आरोपीची अंगझडती घेतली असता आरोपीतांकडून 3,00,000/- रूपये रोख रक्कम, 60,000/- रू किंमतीचे 4 मोबाईल, 4,50,000/- रू किं.पांढरे रंगाची स्विफ्ट क्रमांक एमएच-20-सीसी-9500 व 1,000/- रू किं. एक लोखंडी कत्ती असा एकुण 8,11,000/- रूपये किंमतीचा मुद्देमाल हस्तगत करण्यात आला आहे.तपासकामी जप्त करण्यात आलेल्या रक्कमेबाबत चौकशी केली असता आरोपी आनंद अमर पवार याने इम्रान आयुब शहा याचे सांगणेवरून शादाब अब्बास शेख, रितेश बाबासाहेब आढाव व अमीत पठारे अशांनी मिळून फिर्यादीचे मोटार सायकलला धडक देऊन, लोखंडी कत्तीचा धाक दाखवून पैशाची बॅग जबरीने घेतली.जप्त करण्यात आलेली रक्कम ही चोरीमधील प्रत्येकच्या वाटणीस आलेली आहे अशी माहिती सांगीतली.
आरोपी इम्रान आयुब शहा यास विश्वासात घेऊन, गुन्हयांचे अनुषंगाने विचारपुस करता 6) सुरज सोपान मुठे, वय 24, रा.मुठे वडगाव, ता.श्रीरामपूर, जि.अहिल्यानगर व 7) ऋषीकेश उर्फ सोन्या किशोर पागीरे, वय 25, रा.कांदा मार्केटजवळ, श्रीरामपूर, जि.अहिल्यानगर हे दोघे कांदा मार्केटमध्ये काम करतात.त्यांना फिर्यादी हा दर महिन्याला मार्केटयार्ड श्रीरामपूर येथील व्यापाऱ्याकडून 5 ते 6 लाख रूपये मजुरांना पेमेंट करण्यासाठी मोटार सायकलवरून बॅगमध्ये घेऊन जात असल्याची माहिती होती.इम्रान आयुब शहा व सुरज सोपान मुठे यांना पैशाची गरज असल्याने त्यांनी ऋषीकेश किशोर पागीरे याचे मदतीने फिर्यादीस लुटण्याचा कट केला. दि.28/11/2024 रोजी फिर्यादी हा मार्केट यार्ड, श्रीरामपूर येथून पैस घेऊन निघाल्याची माहिती ऋषीकेश किशोर पागीरे याने इम्रान आयुब शेख व सुरज सोपान मुठे यांना दिली. सुरज मुठे याने फिर्यादी पल्सर मोटार सायकलवरून जात असताना त्याचा पाठलाग करून, इम्रान आयुब शेख यास फिर्यादी दारासिंग डावर दाखवून दिला. त्यानंतर इम्रान आयुब शेख व त्याचे इतर साथीदारांनी फिर्यादीचा अस्तगाव रोडपर्यत पाठलाग फिर्यादीस लुटल्याची माहिती सांगीतली.तसेच चोरी केलेली काही रक्कम खर्च झाल्याची माहिती सांगीतली आहे.
वर नमूद ताब्यातील 6 आरोपीतांना गुन्ह्याचे तपासकामी श्रीरामपूर शहर पोलीस ठाणे येथे मुद्देमालासह हजर करण्यात आले असुन पुढील तपास श्रीरामपूर शहर पोलीस स्टेशन हे करीत आहे.
सदरची कारवाई श्री. राकेश ओला, पोलीस अधीक्षक, अहिल्यानगर, श्री. वैभव कलुबर्मे, अपर पोलीस अधिक्षक, श्रीरामपूर, श्री. बसवराज शिवपुजे, उपविभागीय पोलीस अधिकारी, श्रीरामपूर उपविभाग यांचे सुचना व मार्गदर्शनाखाली स्थानिक गुन्हे शाखेचे पोलीस अधिकारी व अंमलदार यांनी केलेली आहे.
बातमी शेअर करणायसाठी येथे क्लिक करा
