संगमनेर येथील सराफाचे डोळ्यात मिरचीपुड टाकुन लुटणारी टोळी सोन्याचांदीचे दागिने, गावठी कट्टा व जिवंत काडतुसासह जेरबंद स्थानिक गुन्हे शाखेची कारवाई

अहमदनगर दि. ३ जुलै (प्रतिनिधी)
प्रस्तुत बातमीची हकिगत अशी की, दिनांक 26/06/23 रोजी फिर्यादी श्री. प्रसाद पंडीतराव नांदुरकर वय 50, धंदा सराफ, रा. निमगांवजाळी, ता. संगमनेर हे त्यांचे सराफ दुकानातील सोन्या चांदीचे दागिने पिशवीमध्ये भरुन दुकान बंद करुन घरी जाताना पल्सर मोटार सायकलवर आलेल्या अनोळखी दोन इसमांची फिर्यादीचे डोळ्यात मिरचीपुड टाकुन मारहाण करुन 7,62,125/- रुपये किंमतीचे सोन्याचांदीचे दागिने बळजबरीने चोरुन नेले होते. सदर घटने बाबत फिर्यादी यांनी दिलेल्या तक्रारी वरुन आश्वी पोलीस स्टेशन गु.र.नं. 157/2023 भादविक 394, 34 प्रमाणे जबरी चोरीचा गुन्हा दाखल करण्यात आला होता.
सदर घटना घडल्यानंतर मा. श्री. राकेश ओला साहेब, पोलीस अधिक्षक, अहमदनगर यांनी पोनि/श्री. दिनेश आहेर, स्थागुशा यांना स्थानिक गुन्हे शाखेतील पोलीस अधिकारी व अंमलदार यांचे पथक नेमुन गुन्ह्याचा समांतर तपास करुन गुन्हा उघडकिस आणणे बाबत आदेश दिले होते.
नमुद आदेशा प्रमाणे पोनि/श्री. दिनेश आहेर यांनी स्थानिक गुन्हे शाखेतील पोसई/सोपान गोरे, मनोहर शेजवळ, पोहेकॉ/मनोहर गोसावी, दत्तात्रय गव्हाणे, देवेंद्र शेलार, पोना/रविंद्र कर्डीले, सचिन आडबल, विशाल दळवी, संतोष खैरे, ज्ञानेश्वर शिंदे, फुरकान शेख, पोकॉ/शिवाजी ढाकणे, मेघराज कोल्हे, अमृत आढाव व प्रशांत राठोड अशा पोलीस अधिकारी व अंमलदार यांचे पथक नेमुण नमुद गुन्ह्यातील पाहिजे आरोपींचा शोध घेवुन कारवाई करणे बाबत आदेश दिले. पथक नेवासा, सोनई परिसरात फिरुन आरोपींची माहिती घेत असताना पोनि/श्री. दिनेश आहेर स्थागुशा यांना गुप्तबातमीदारा मार्फत माहिती मिळाली की, काही इसम पांढरे रंगाचे स्कॉर्पिओ गाडीमधुन संगमनेर येथील सराफाचे डोळ्यात मिरचीपुड टाकुन चोरी केलेले सोन्याचांदीचे दागिने, गावठीकट्टा व जिवंत काडतुस विक्री करण्यासाठी नेवासा फाटा येथे येणार आहे. आता गेल्यास मिळुन येईल अशी खात्रीशीर माहिती मिळाली. पोनि/श्री. आहेर यांनी प्राप्त माहिती पथकास कळवुन खात्री करुन कारवाई करणे बाबत सुचना दिल्या.
पथकाने लागलीच नेवासा फाटा, ता. नेवासा येथे जावुन सापळा लावुन थांबलेले असताना थोडाच वेळात नेवासा ते नेवासा फाटा रोडने एक पांढरे रंगाची स्कॉर्पिओ येताना दिसली. पथकाची खात्री होताच स्कॉर्पिओ चालकास हात दाखवुन थांबण्याचा इशारा केला. सदर स्कॉर्पिओ चालकास संशय आल्याने त्याने ताब्यातील स्कॉर्पिओ भरधाव वेगात अहमदनगरचे दिशेने घेवुन जावु लागला. पथकाने स्कॉर्पिओचा पाठलाग चालु केला व सदर स्कॉर्पिओ गाडी सुरेशनगर, त्रिवेणीश्वर कमानी जवळ, नेवासा फाटा, ता. नेवासा येथे 16.00 वा. आडवुन गाडीतील संशयीत इसमांना ताब्यात घेतले. ताब्यात घेतलेल्या संशयीत इसमांना पोलीस पथक व पंचाची ओळख सांगुन त्यांचे नाव गांव विचारले असता त्यांनी त्यांची नावे 1) खंडेश्वर रमेश ठोंबळ, वय 23, रा. आंत्रे, शहरटाकळी, ता. शेवगांव, 2) आकाश बाळासाहेब चौधरी, वय 23, रा. रांजणगांव, ता. शेवगांव व 3) प्रमादे रावसाहेब गायकवाड, वय 33, रा. मुसळेवस्ती, लोणी, ता. राहाता मुळ रा. पढेगांव, ता. श्रीरामपूर असे असल्याचे सांगितले. त्यांची व स्कॉर्पिओ गाडीची पंचासमक्ष झडती घेता त्यांचे अंगझडतीमध्ये एक गावठी बनावटीचा कट्टा व तीन जिवंत काडतुस व स्कॉर्पिओ गाडीचे झडतीमध्ये काळे रंगाचे बॅगेत विविध प्रकारचे सोन्याचे व चांदीचे दागिने मिळुन आले.
ताब्यातील इसमांकडे सोन्याचांदीचे दागिने, गावठी बनावटीचा कट्टा व जिवंत काडतुस या बाबत विचारपुस करता त्यांनी दिनांक 26/06/23 रोजी निमगांवजाळी, ता. संगमनेर येथील सोनाराचे दुकाना समोर पाठत ठेवुन सोनार दुकानबंद करुन निघाल्यानंतर त्याचा पल्सर मोटार सायकलवर साथीदारासह पाठलाग करुन डोळ्यात मिरचीपुड टाकुन लुटलेले सोन्याचांदीचे दागिने तसेच गावठी कट्टा व जिवंत काडतुस विक्री करण्यासाठी आलो असल्याची कबुली दिल्याने तिनही आरोपींना ताब्यात घेतले.
ताब्यात घेतलेल्या आरोपींचे कब्जातुन आश्वी पोलीस स्टेशन गु.र.नं. 157/2023 भादविक 394, 34 प्रमाणे दाखल गुन्ह्यात चोरीस गेलेले 8,50,472/- रुपये किंमतीचे विविध प्रकारचे सोन्याचांदीचे दानिगे, तसेच 30,000/- रुपये किंमतीचा एक गावठी बनावटीचा कट्टा, 1,500/- रुपये किंमतीचे तीन जिवंत काडतुस, 5,00,000/- रुपये किंमतीची एक पांढरे रंगाची स्कॉर्पिओ गाडी व 45,000/- रुपये किंमतीचे एक विवो कंपनीचा व दोन सॅमसंग कंपनीचे मोबाईल फोन असा एकुण 14,26,972/- रुपये किंमतीच्या मुद्देमालासह ताब्यात घेतले. व पोना/185 ज्ञानेश्वर नामदेव शिंदे, ने. स्थानिक गुन्हे शाखा, अहमदनगर यांचे फिर्यादी वरुन नेवासा पोलीस स्टेशन गु.र.नं. 724/2023 आर्म ऍ़क्ट 3/25 प्रमाणे गुन्हा दाखल केला आहे. पुढील तपास नेवासा पोलीस स्टेशन करीत आहे.
सदर कारवाई मा. श्री. राकेश ओला साहेब, पोलीस अधीक्षक, अहमदनगर, श्रीमती. स्वाती भोर मॅडम, अपर पोलीस अधिक्षक, श्रीरामपूर व मा. श्री. सुनिल पाटील साहेब, उपविभागीय पोलीस अधिकारी शेवगांव विभाग यांचे सुचना व मार्गदर्शना खाली स्थानिक गुन्हे शाखेचे पोलीस अधिकारी व अंमलदार यांनी केलेली आहे.