सामाजिक
भावी पिढी शारीरिक आणि मानसिकदृष्टया सुदृढ असावी : प्रा. विधाते स्नेहबंध व साई डेंटल तर्फे विद्यार्थ्यांसाठी मोफत दंतचिकित्सा शिबीर
- अहमदनगर – आजचे विद्यार्थी हे देशाचे भावी नागरिक आणि आधारस्तंभ आहेत. देशाची ही भावी पिढी शारीरिक आणि मानसिकदृष्टया अधिक सुदृढ असायला हवी, असे प्रतिपादन राष्ट्रवादी काँग्रेसचे शहर जिल्हाध्यक्ष प्रा. माणिकराव विधाते यांनी केले.
स्नेहबंध सोशल फाउंडेशन व साई डेंटल क्लिनिक यांच्या संयुक्त विद्यमाने तपोवन रोड येथील बालघर प्रकल्प व अभिनव बाल विकास शाळेत मोफत दंतचिकित्सा शिबीराचे आयोजन करण्यात आले होते, त्यावेळी प्रा. विधाते बोलत होते.
याप्रसंगी राष्ट्रवादी ओबीसी सेलचे शहर जिल्हाध्यक्ष अमित खामकर, स्नेहबंध फाउंडेशनचे अध्यक्ष उद्धव शिंदे, भाजपा महिला आधाडीच्या अध्यक्षा ज्योत्सना मुंगी, बालघर प्रकल्पाचे संचालक युवराज गुंड, अभिनव शाळेच्या मुख्याध्यापिका सरला राळेभात, पूजा मडावी, हेमंत ढाकेफळकर, जान्हवी मुंगी, संजू लोखंडे, विद्या खेमणार, मोहिनी पालांदे आदी उपस्थित होते. डॉ. अतुल मडावी यांनी या विद्यालयातील ४५ विद्यार्थ्यांची दातांची तपासणी केली.
शारीरिक आरोग्याप्रमाणे मौखिक आरोग्यही गरजेचे
- साई डेंटल क्लीनिकचे डॉ. अतुल मडावी म्हणाले, समाजातील काहीशा दुर्लक्षित असलेल्या विद्यार्थ्यांना योग्य वैद्यकीय सेवा मिळायला हव्यात. विद्यार्थ्यांसाठी शारीरिक आरोग्याप्रमाणे मौखिक आरोग्य हे देखील गरजेचे आहे. त्यासाठी या दंत तपासणी शिबीराचे आयोजन केले. विद्यार्थ्यांना दंत तपासणी नंतर भंडारी सप्लायर्सचे संचालक रुपेश भंडारी यांच्या वतीने औषधांचे वाटप करण्यात आले. प्रास्ताविक युवराज गुंड यांनी तर आभार संजू लोखंडे यांनी मानले.
