देशस्तंभ ऑनलाईन न्यूज नेटवर्क : अहिल्यानगर: दि. 27 नोव्हेंबर (प्रतिनिधी)- केडगाव येथील विशाल मारुती निमसे यांनी पोलीस दलात कार्यरत असलेल्या देविदास रामदास शेंडे यांच्या सावकारी त्रासाविरोधात रिपब्लिकन सेनेच्या माध्यमातून पोलीस उपअधीक्षकांना निवेदन देऊन न्यायाची मागणी केली आहे.
निवेदनात म्हटले आहे की, विशाल निमसे यांनी 21 जानेवारी 2024 रोजी प्रमोद सुरेकर यांच्या मध्यस्थीने देविदास शेंडे यांच्याकडून व्याजाने 5 लाख रुपये घेतले. दर महिन्यास 30 ते 35 हजार रुपये असे जवळपास नऊ महिने व्याज दिल्याचे पीडित निमसे यांचे म्हणणे आहे.
दरम्यान, व्याज देण्यासाठी विशाल निमसे यांची पत्नी वैशाली निमसे या 1 ऑक्टोबर 2025 रोजी केडगाव भूषणनगर येथे देविदास शेंडे याच्या घरी व्याज देण्यासाठी पत्नी वैशाली निमसे गेली असतांना, शेंडे याच्या पत्नीने वैशाली निमसे यांना मारहाण केली केल्याचा आरोप आहे. याबाबत वैशाली निमसे यांनी
कोतवाली पोलीस स्टेशनमध्ये तक्रारही नोंदवली. तक्रारीनंतर उलट पोलीस देविदास शेंडे यांनी विरोधात कारवाई केली, म्हणून मध्यस्थ प्रमोद सूरेकर व वैशाली निमसे यांच्यावर विनयभंगाचा खोटा गुन्हा दाखल केल्याचे निवेदनात नमूद करण्यात आले आहे.
व्याजाच्या पैशांचा व्यवहार असूनही जास्तीचे व्याज न दिल्याने शेंडे यांनी 1 जुलै 2025 रोजी केडगाव येथील त्याचे घर स्वतःचे चुलत भाऊ संतोष शेंडे यांच्या नावे बळजबरीने खरेदी केल्याचा गंभीर आरोपही करण्यात आला आहे. घरावरील बँकेचे कर्ज भरले असले तरी उर्वरित रक्कम परत न केल्याचेही निवेदनात म्हटले आहे.
या सर्व प्रकाराचा गांभीर्याने तपास करून देविदास शेंडे यांच्याकडे अधिकृत सावकारीचा परवाना आहे का, याची चौकशी करून त्यांच्यावर योग्य ती कायदेशीर कारवाई करावी, अशी मागणी रिपब्लिकन सेनेने केली असुन या मागणीचे निवेदन उप पोलिस अधीक्षक टिपरसे यांना देण्यात आले आहे. सदर प्रकरणी अहिल्यानगरचे दुय्यम निबंधक यांना देखील पीडित निमसे कुटूंबासमवेत निवेदन देणार आहे. यावेळी रिपब्लिकन सेना महिला आघाडीच्या शहराध्यक्षा सुनीता शिंदे, पीडित वैशाली निमसे, विशाल निमसे, जिल्हाध्यक्ष सुनील शिंदे, महेश भोसले, संजय ताकवले, बाळासाहेब वाघमारे, विवेक विधाते, विकास रणदिवे, नेहा जावळे, बेबीताई टकले, मंगल बरकडे आदी उपस्थित होते.
बातमी शेअर करणायसाठी येथे क्लिक करा
