कर्जत उपविभागातील ९ आरोपी हद्दपार – प्रांताधिकारी डॉ अजित थोरबोले

कर्जत (प्रतिनिधी) : दि १५ जुलै
कर्जत उपविभागातील ९ आरोपींना हद्दपार करण्यात आली असल्याची माहिती प्रांताधिकारी डॉ अजित थोरबोले यांनी दिली. यामध्ये कर्जतचे २ तर जामखेड तालुक्यातील ७ आरोपींचा समावेश आहे.
कर्जत उपविभागांतर्गत कायदा आणि सुव्यवस्था राखणे कामी पोलीस निरीक्षक कर्जत आणि जामखेड यांच्या मार्फत मुंबई पोलीस अधिनियम १९५१ चे कलम ५६(१)(अ)(ब) अन्वये हद्दपार करणेकामी प्रस्ताव प्रांताधिकारी कार्यालय कर्जत यांना प्राप्त झाले होते. यामध्ये कर्जत तालुक्यातील विलास अबलुक्या काळे(कर्जत) आणि पदमराज अर्जुन ढोणे(मिरजगाव) या दोघांना अहमदनगर जिल्हा यासह बीड जिल्ह्यातील आष्टी, पुणे जिल्ह्यातील दौंड, सोलापूर जिल्ह्यातील करमाळा तालुक्यातून ६ महिन्यासाठी हद्दपार करण्यात आले आहे. तसेच जामखेड तालुक्यातील महादेव रावसाहेब जायभाय(रा.जायभायवाडी) यास १ वर्षाकरिता तर पप्पू उर्फ ऋषिकेश मोहन जाधव(जामखेड), शरद गुलबशा भोसले(खांडवी), हनिफ अय्युब कुरेशी(खर्डा), दीपक अशोक चव्हाण(जामखेड), शरद उर्फ बंडू युवराज मुळे(सारोळा) यांना ६ महिन्यासाठी तसेच अविनाश भुजंग निकम (शिऊर) यास ३ महिन्यासाठी अहमदनगर, बीड आणि उस्मानाबाद जिल्ह्यातून हद्दपार करण्यात आले आहे. सदर प्रस्तावावर उपविभागीय पोलीस अधिकारी अण्णासाहेब जाधव यांनी चौकशी करून वरील ९ आरोपींचा अहवाल कर्जतचे प्रांताधिकारी डॉ अजित थोरबोले यांच्याकडे पाठविले होते. त्यानुसार सदर वरील ९ जणांविरुद्ध प्रतिबंधात्मक कारवाई करण्यात आली असल्याची माहिती प्रांताधिकारी कार्यालय कर्जत यांच्याकडून देण्यात आली आहे.