कौडाने शिवारात टेम्पो अंगावर घालून एकाचा खून

कर्जत (प्रतिनिधी) : दि २७ मे
कौडाने (ता.कर्जत) येथे स्वताच्या लहान मुलाला आपल्या सोबत घेवून जाण्याची विनंती करण्यासाठी गेलेल्या जावयाचा खून झाल्याची घटना समोर आली आहे. याबाबत कर्जत पोलिसांनी एकूण सात जणांवर गुन्हा दाखल केला आहे.
याबाबत पोलीस सूत्राकडून मिळालेल्या माहितीनुसार, गुरुवार, दि २६ मे दुपारी १ वाजेच्या सुमारास दत्तात्रय जानू मुळे (वय ३८) हे कौडाणे येथे सासुरवाडीत मुलाला नेण्यासाठी गेले होते. त्यावेळी त्यांनी सासरकडील नातेवाईकांना मुलाला सोबत पाठविण्याची विनंती केली. यावेळी रविंद्र बाबासाहेब सुद्रिक, बाबासाहेब दत्तात्रय सुद्रीक, नरेंद्र सदाशिव सुद्रीक, विठ्ठल सदाशिव सुद्रीक, अमोल बाबासाहेब सुद्रीक, सदाशिव दत्तात्रय सुद्रीक (सर्व रा. मुळेवाडी ता.कर्जत) यातील दोघांनी मुळे यांना संगनमत करून चापटाने व लाथाबुक्क्यांनी मारहाण केली. यासह जमिनीवर आपटले. कोणीतरी टेम्पो चालक विनोद प्रशांत गोल्हार (रा.कापशी, ता.आष्टी,जि.बीड) यांना टेम्पोने उडविण्याची चिथावणी दिली. चालकाने टायर अंगावरुन नेवून डोक्यात व छातीस गंभीर दुखापत करून त्यास जिवे मारले असल्याचे फिर्यादीत नमूद केले आहे. सुनिल जानू मुळे यांच्या फिर्यादीवरून सदर ७ आरोपींविरुद्ध कलम ३०२,३२३, १०९, ३४ प्रमाणे गुन्हा दाखल करण्यात आला आहे. घटनेची माहिती मिळताच उपविभागीय पोलीस अधिकारी अण्णासाहेब जाधव, पोलीस निरीक्षक चंद्रशेखर यादव, सहाय्यक पोलीस निरीक्षक सतिश गावित यांनी घटनास्थळी भेट दिली. सदर घटनेचा पुढील अधिक तपास सतिश गावित हे करीत आहे.