तू मला आवडतेस, मला फोन कर म्हणाऱ्यास जेलची हवा!
कर्जत (प्रतिनिधी) : दि १० जुलै
तू मला आवडतेस, मला फोन कर ! असे म्हणत अल्पवयीन मुलीला त्रास देणाऱ्यास कर्जत पोलिसांनी चांगली जेलची हवा दिली. बाबा भास्कर भिसे (रा. हंडाळवाडी, ता.कर्जत) असे या रोड मजनुचे नाव असून त्यास कर्जत पोलिसांनी जेरबंद केले.
पोलीस सूत्रांकडून मिळालेल्या माहितीनुसार, प्राजक्ता (बदललेले नाव) कर्जत येथील एका शाळेत शिकत आहे. ती शिक्षणासाठी रोज घरापासून शाळेपर्यंत एसटी बसने येत असून शुक्रवार, दि.८ रोजी ती नेहमीप्रमाणे शाळेत आली होती. दुपारी ४ वाजता शाळा सुटल्यानंतर ती घरी जाण्यासाठी कर्जत बसस्थानकावर थांबली असता याच ठिकाणी अंगात निळा शर्ट व जीन्स पॅन्ट असलेला अनोळखी मुलगा दुचाकी घेऊन (एम.एच १६ सी.एस २६८८) प्राजक्ताच्या जवळ आला व त्याने तिच्याजवळ असलेली दप्तराची बॅग ओढत तिच्या हाताला पकडून चिट्ठी देण्याचा प्रयत्न केला. ‘तू मला आवडतेस, मला फोन कर’ असे बोलून अश्लील हावभाव करून तिला लज्जा उत्पन्न होईल असे वर्तन केले. हा प्रकार घडत असताना शेजारी उभे असलेल्या विद्यार्थीनीनी सदर तरुणाचे आणि दुचाकीचे फोटो काढले. आणि ते फोटो कर्जत पोलिसांना सेंड केले. पोलीस निरीक्षक चंद्रशेखर यादव, पोलीस कर्मचारी गोवर्धन कदम, मनोज लातूरकर, दीपक कोल्हे, ईश्वर माने यांनी तात्काळ बसस्थानक गाठले आणि त्या रोड मजनुचा शोध घेतला. मात्र तो त्या ठिकाणी आढळून आला नाही. घरी गेल्यानंतर प्राजक्ताने सर्व प्रकार तिच्या वडिलांना सांगितला.
याच दरम्यान कर्जत पोलिसांनी त्या तरुणाचा आणि त्याच्या दुचाकीच्या क्रमांकावरून शोध घेतला असता त्याचे नाव बाबा भास्कर भिसे (रा. हंडाळवाडी, ता.कर्जत) असल्याचे निष्पन्न झाले. मुलीच्या वडिलांनी दिलेल्या फिर्यादीनंतर त्याच्यावर भादवी कलम ३५४ विनयभंगाचा बाल लैंगिक अत्याचार प्रतिबंध कायद्यांतर्गत गुन्हा दाखल करून पोलीस अधिकारी अनंत सालगुडे, पोलीस कर्मचारी गोवर्धन कदम, श्याम जाधव, सुनील खैरे यांनी तात्काळ अटक करीत जेलची हवा दाखवली आहे. किमान २ महिने त्यास जेलची हवा खावी लागणार असल्याची प्रतिक्रिया पोलीस निरीक्षक चंद्रशेखर यादव यांनी दिली. या अगोदरही त्याने अनेक मुलींना त्रास दिल्याची आणि जाळ्यात ओढल्याची माहिती समोर येत आहे.
